Haegeysa- (Somaliland24)- Sannad Guuradii 21aad Ee Ka Soo Wareegtay Markii Somaliland Ka Go’day Soomaaliya Inteedda Kale  18 May 1991-Kii, Ayaa Maanta Si Weyn Looga Dabaal Degay Magaalooyinka Waaweyn Ee Somaliland. Kumanaan kun oo Qof oo dadweynaha Magaalada Hargeysa Ka mid ah, ayaa hiirtii waaberi u soo jarmaaday Garoonka weyn ee Beerta Xorriyadda, kuwaas oo calanka somaliland siyaabo kala duwan u soo xidhay, qaar dhar ka dhigtay, kuwa dalad ka dhigtay iyo qaar wajiga ku soo xardhayba. Guud ahaanba Meheradii ganacsi iyo Shaqooyinkiiba ayaa la soo wada xidhay, waxaanay waddooyinka iyo Studio-yada Magaalada ku yaalla laga wada saaray Heeso Waddaniya, iyagoo Baabuurta lagu rakibay Sameecado waaweyn, isla markaana dhallinyaradu Xaga sare ka fuuleen baabuurtaasi iyagoo lulaya Calanka Somaliland. Madaxda ugu Saraysa Somaliland oo uu hogaaminayo Madaxweynaha Somaliland Md: Axmed Maxamed Maxamuud Siilaanyo ayaa iyagu dadweynaaha kala soo qayb galay xuska 21 guurada madax banaanidda somaliland, waxaana halkaasi hadalo kookooban ka soo jeediyey Xisbiyadda Qaranka, maayarka Hargeysa iyo wasiirka Arrimaha gudaha, waxaana soo gabogabeeyey madaxweynaha Somaliland, isagoo khudbadiisa ku soo qaaday taariikhdii Somaliland soo martay, siyaasadda uu hadda dalka ku waddo iyo mustaqbalka Somaliland .

Madaxweyne Axmed Siilaanyo  ayaa u duceeyey dadkii wax ka soo dhisay qaranka Somaliland waxa kale oo uu sheegay qolooyinka siyaasadda ee wax tirsanaya inay janiskooda iska sugaan, maadaama oo samirku fiican yahay, waxaanu xusay in isaga sideetan cod kaga tanaasulay wakhtigii doorashadii 2003dii, balse u iska samray, isagoo dardaaran faray qofkasta oo hunguri ka qabo siyaasadda hadii sidii uu doonayey u dhici waydo uu dulqaato, dantiisa ka horumariyo danta guud, isagoo somaliland ku tilmaamay qori isku dhiib maalinba nin loo dhiibayo.

Mar uu madaxweynuhu ka hadlay wada hadalkii u dhexeeyey somaliland iyo Somalia, waxa uu yidhi “Innagu dhinaceena wada hadalkaa intii innagaga beegnayd waynu fulinay walaaleheena Soomaaliyana waxaan ka rajaynayaa inay dhinacooda ka soo fudaydiyaan wixii ku xidhan, iyagoo qadarinaya go’aankii loo dhamaa ee beesha caalamka”

Sidoo kale, waxa uu la dardaarmay madaxda soomaaliya, oo uu sheegay inay shacabka soomaaliyeed u tudhaan, isla markaana dantooda ka horaysiiyaan danta caamka ah ee bulshadda soomaaliyeed ee ay madaxda u yihiin, isagoo sheegay inuu ka xun yahay dhibaatadda ay wehelka la noqdeen shacabka soomaaliyeed.

Inkastoo sanadkan dawladdu aanay si weyn u abaabulin xuska sanadkan, balse dadka ayaa iskood isku soo abaabulay, iyadoo dhalinyaradu xalay aanay magaaladda ka seexan, iyagoo baabuur ay calanka somaliland ku xardheen la wareegayey wadooyinka magaaladda Hargeysa, qaarkoodna ku mashquulsanayeen macradada baabuurta lagu kireeyo oo ay baabuurta ka soo kiraysanayeen.

Dadweynaha qaar ayaa u haystay in maalinta jimcaha darteed dib loogu dhigay xuska maalinta sabtida, haseyeeshee, waxa ay ku waabeeristeen Hoonka baabuurta iyo sameecadda qayladda weyn ee lagu rakibay ee heesaha wadaniga ah ka baxayeen, taas ayaa keentay in dadku aad iskugu soo baxo.

Si kastaba ha ahaate, xafladdo kale oo iyana lagu weynayno maalintan ayaa caawa ka dhici doonta qasriga madaxtooyadda, iyadoo hoteladda qaarkoodna ay fanaaniintu ku dhigi doonaan bandhigyo heeso ah.

Haddaba Warka Suldaanka Oo Dhammaystiran Hoos Ka Daawo.